Why the Conyo?!

"Kasi naman, you know…You make me kakainis no?"

"Lam mo pare, ang ganda ng cars men, they’re like astig na savvy"

"It’s not my problem, it (eat?) yours"

Hay, Pilipino nga naman o. Sabi nga ng trainer namin sa call center: "What is unique with us Filipinos is that we are great imitators and has a neutral tone". Kaya nga ang galing natin mag-Ingles eh! Nagsulputan ang mga business outsourcing companies na nagbigay mga trabaho sa mga bagong gradweyt, di nag-gradweyt at mga frustrated mag-gradweyt.

Bilang call center agent, masasabi ko may "edge" tayo sa kakumpetensya natin na mga Bumbay. Ang hirap nila kasing intindihin. Pero, hindi talaga maiiwasan na pati mga Kano, makahalata na hindi nila kababayan ang kinakausap nila, kundi Pinoy…minsan lumalabas ang pag-kasuperyor ng mga puti. Surrender naman si Juan De la Cruz sa mga "diyos-diyosan".

Pero nang nandito na ako sa Cebu, napansin ko: Ang mga batang Cebuano na lumaki sa Pilipinas, edukado at may-kaya, puro Ingles na lang ang biubuka ng bibig na animo’y lumaki sa Tate. Karamihan pa sa kanila, hindi na marunong magsalita kahit Tagalog man lang! Asar! Kudos sa mga magulang, dinagdagan na nila ang mga ilustradong maaaring tumalikod na sa Pilipinas! (sarcastic). Hindi ko talaga makuha ang logic na nagsasalita ang mga bata ng Ingles kahit nasa lansangan nila.

Elitista

Kung edukado ka sa Pilipinas, alam mong mag-salita ng Ingles o kahit anong wikang banyaga. Kung tutuusin, naging "status symbol" na nga ito ng mga mayayaman at may-kaya.

Simula pa sa panahon ng Kastila, kung mayaman ka, Ilustrado ka, marunong kang magsalita ng Espanyol. Nang dumating si Uncle Sam, binigyan nya tayo ng libreng edukasyon kaso dalawa ang mukha: mamulat at maging alipin. Binigyan nya ng bagong mukha ang pagiging elitista, ang makapag-salita ng Ingles.

Pero tila katotohanan na nga yatang may kahirapan ng buhay sa Pilipinas. Ang systema ng edukasyo’y nabubulok at naaayon pa sa mga turo ni Uncle Sam. Karamihan sa mga kapitbahay ni Juan de la Cruz, wala ng pakialam kung ano pa ang mangyari sa lipunan, basta mabuhay lang sila kinabukasan OK lang. Anong pakialam nila kay Aristitle, kay George Washington o pati na kay Aguinaldo. Masakit pero ito ang katotohanan.

Naipagpapatuloy na lang ng nalalabi ang pag-aaral. Maaaring karamihan sa mga Pinoy ay may opinyon na kung ika’y nakapag-tapos, marami kang oportunidad na maaaring mag-paahon sa kasadlakan ng kahirapan.

Balik tayo sa usapin ng Ingles, dahil para talagang may social class nga sa lipunang Pinoy, karamihan sa mga marunong magsalita ng Ingles na diretso at animo’y Kano ay yung mga nasa high school o di kaya ang mga nakapagtapos ng kolehiyo. Pero binalot na ng tipong elitista ang pagsasalita ng Ingles ng diretso.

————————————————————————————————-

(**Sa mga konserbatibo, skip nyo na lang ang paragraph na susunod**)

Napansin ko nga rin sa klasrum, kung nag-didiskas si ser tungkol sa sex, ang penis at vagina o di kaya sexual intercourse ay ok lang pakinggan, pero kung titi, pekpek o kantutan na ang sasabihin, bastos na! Pareho ang binabanggit, iba ang flavor. mas bastos nga bang pakinggan kung nakiki-jerjer ka kaysa sex? (sorry for the obscene language, dito ko kasi gusto ipahiwatig ang saloobin ko tungkol sa wikang Ingles at Filipino)

 —————————————————————————————————Ang wikang Ingles kasi dito sa Pilipinas ay ginagamit sa mga transaksyon sa negosyo, pakikipag-usap sa mga banyaga o pati na para magkaintindihan na ang Cebuano sa Ilocano. Ang wika na tila nabalutan ng kolonyal na mentalidad.

 Jologs

Nakakainis na marinig ang mga pa-sosy at feeling sosyal kung magsalita ng Ingles! Pun****! Ang galing na nga nilang mang-estima, ang galing pa nilang magsalita ng Ingles! Karabao Ingles! Para lang may-feel na sila ang nasa itaas ng mundo! Yikes! Sunugin!

Dahil na rin sa hindi nila pormal o talaga lang hindi epektib si mam sa school mag-turo ng ingles, kaya karamihan sa masa kung magsalita ng ingles, kung hindi mali ang pronunsasyon, mali ang grammar, mali ang spelling. Limitado. Kaya you know, ispokening dalars is da best talaga mam!

Natatawa na lang ako kung minsan marinig ko ang mga nauso noon na Erap jokes. Ang ex-president kasi hindi marunong mag Eyngles.

Dala na rin ng pabulok na pabulok na sistema ng edukasyon sa Pilipinas, nasira na rin ang kalidad ng pagtuturo sa mga pampublikong paaralan dahil na rin kulang sa badyet o talagang siksikan lang ang mga bata sa isang kwarto na parang sardinas! Konti lang naman ang pumapasok sa pampribadong paaralan, kaya namementene pa ang kalidad ng pagtuturo…na nagdadala sa problema na ang Ingles ay salita ng mga elitista at edukado. Nagpapalawak ng hati sa pagitan ng mayayaman at mahihirap.

I can’t gets it nga eh!

Dahil ang Pilipinas ay binubuo ng sankaterbang mga wika, ang hirap magkaintindihan. Karamihan sa mga kabataan ngayon, hindi na nila alam kung paano magsalita ng diretsong Tagalog, Bisaya o Ilocano. May halo na itong "substitute words" na ingles, kung hindi nila maibigkas ng diretso kaya ayun.

Halimbawa:

"Alam mo ba ang cup na yan, parang starbucks!" ?huh?!

Bisaya

Kala mo kung sinong marunong ang mga taga-Maynila kung kutyain nila ang mga Bisaya sa Ingles! Kung ang ‘e’ naging ‘i’ o ang ‘o’ naging ‘u’, at mali ang pronounciation, hala it’s chimay englis (oi, may lugar na Englis sa Cebu, humanda kayo mga Tagalog kayo). Ang laki siguro ng kakainin nilang mga salita dahil ang daming call centers dito sa Cebu. Hay, gusto ko lang makita ang pamumula sa hiya ng mga yan!

Tapos….

Kung tutuusin, hindi na maiiwasan na magsalita ng Ingles sa pang-araw araw na buhay. Habang umaagos ang panahon, kailangan talagang nating sumabay sa agos nito. "Nothing is constant but change" ika nga.

Ang ingles nga talaga ay tunay na makapag-bubukas sa maraming oportunidad para kay Juan de la Cruz upang mapaunlad nila ang kanilang pamumuhay. Pero, masaklap isipin, ito’y nababalot sa mala-elitistang aura. Marahil na rin sa edukasyon na tila napapabayaan na ng panahon.

Nalulungkot din ako dahil marami sa mga kabataan ngayon, tila kinalimutan na nila ang sariling atin dahil sa tingin nila, ito’y backward o taga-bundok at probinsya lang ang nakapag-sasalita ng mga sinaunang wika. "Mga mahihirap lang ang gumagamit niyan" na uri ng pag-iisip. Pilipino nga, masaklap…sabi nga sa isang thread sa Lonely Planet.com "They are more American than Americans themselves". Ang dilemma ng nasyonalismo at globalisasyon.

Ang Ingles ay para sa lahat at hindi lang sa mga edukado o mayayaman. Lahat may karapatang gumamit nito. Nawa’y ganun naman ang pag-trato natin sa ating wikang sariling atin.

(Parang kulang pa ano? Open ako sa kumento at suhestyon o bayolenteng reaksyon mula sa publiko)